• Today is: Monday, November 20, 2017

දැරියකගේ මල්වර සමය ……

download

දැරියක් පිරිපුන් කාන්තාවක් බවට පත් වීම පැය කිහිපයක් හෝ දින කිහිපයක් ඇතුලත සිදුවන්නක් නොවේ. ඒ සඳහා වසර කිහිපයක් ගතවන අතර පියවර ගනනාවකින් යුතු වර්ධන ක්‍රියාවලියක් පසුකර යා යුතුවේ. මෙය ඇඩ්රිනල් ග්‍රන්ථින් සක්‍රීය වීම සහ ශරීර හැඩය වෙනස් වීම ,ශරීරයේ විවිධ ස්ථාන වල සිදුවන රෝම වර්ධනය, පියයුරු වර්ධනය සහ මාසික ඔසප් චක්‍රයේ ආරම්භය  යන අවධින්ගෙන් සමන්විතය. වයස 10-11 පමණ කාලයකදී ඇරඹෙන මෙම ක්‍රියාවලිය සම්පුර්ණ වන විට වයස 15-17 පමණ වේ. මේ අතරින් පියයුරු වර්ධනය සහ එහි අවධීන් සම්බන්ධව අප මින් පෙර සාකච්ඡා කළ අතර අද ශරීරයේ රෝම වර්ධනය සම්බන්ධව කතා කරමු.

Tanner-staging-image-female-909x1024

ශරීර රෝම වර්ධනය අතරින් ලිංගාශ්‍රිත ප්‍රදේශවල සිදුවන රෝම වර්ධනය ප්‍රධාන තැනක් ගනී.මෙය පියුබරාකි ( puberache ) ලෙස හැදින්වේ.මෙහිදී ස්ත්‍රී බාහිර ලිංගික අවයව වල බාහිර තොල් (labia majora) ආශ්‍රිතව රෝම වර්ධනය ඇරඹේ. අනතුරුව මෙම රෝම, සංඛ්‍යාවෙන් වැඩිවී ශ්‍රෝණියේ ඉදිරිපස වඩාත් ඉහලින් ඇති ත්‍රිකෝණාකාර(pubic triangle) ප්‍රදේශය ආවරණය කරන පරිදි සකස් වේ .පසුව මෙම රෝම කළවා වල ඇතුලත ප්‍රදේශයටත් අනතුරුව පෙකණිය (නාභිය) ප්‍රදේශයත් පැතිරේ.

බොහෝ විට දැරියකගේ සිරුරේ පියයුරු වර්ධනය සිදුවීම ඇරඹීමට පෙර සිටම රෝම වර්ධනයේ මුලික අවස්ථාවන් දැකිය වනු ඇත . ශරීරයේ කිහිලි ප්‍රදේශ වල රෝම ඇතිවීමද ලිංගාශ්‍රිත රෝම වලට වර්ධනයට සමගාමීවම සිදුවේ. මෙම  රෝම වර්ධනයේ  මල්වර සමයට (puberty) පෙර කොටස  ඇඩ්රිනල් ග්‍රන්ථින් වලින් ශ්‍රාවය වන ඇන්ඩ්‍රජන් හෝමෝන ක්‍රියාකාරීත්වය තුලින්ද පසු කොටස ස්ත්‍රී ලිංගික හෝමෝන ක්‍රියාකාරීත්වය තුලින්ද සිදුවන බව සොයාගෙන ඇත.

– වෛද්‍ය චන්දික එපිටකඩුව

Tags: